Երեքշաբթի՝ 2013 թւականի օգոստոսի ճաշւայ ժամը 12-ին, Ս. Ամենափրկչեան Վանք այցելեցին Ղոմ քաղաքի “Ջամէաթ-օլ-մոսթաֆա-ալալամիէ” խմբակցութեան կողմից կազմակերպւած քրիստոնեայ (կաթոլիկ) - իսլամ (շիա) երկխօսութեան կապակցութեամբ երկրորդ համագումարին մասնակցելու նպատակով Իրան հրաւիրւած Ամերիկայի Մինիսոթա քաղաքի Սուրբ Թովմաս աստւածաբանական համալսարանի չորս պրոֆեսոր, դոկտոր եւ դասախօսներ:

Խումբը Ս.Ա. Վանքի ծաղկեայ դահլիճում հանդիպում ունեցաւ Սպահանի Հայոց Թեմի առաջնորդ գերշ. Տ. Բաբգէն եպս. Չարեանի հետ: Հանդիպմանը ներկայ էր նաեւ Իրանի Իսլ. Խորհրդարանում Սպահանի եւ հարաւային իրանահայութեան պատգամաւոր պրն. Ռոբերտ Բեգլարեանը:

Առաջնորդ Սրբազան Հայրը համապարփակ տեղեկութիւններ փոխանցեց Իրանում եւ յատկապէս Սպահանի Հայոց Թեմում ապրող հայ համայնքի կացութեան վերաբերեալ, անդրադառնալով իբրեւ քրիստոնեայ կրօնական փոքրամասնութիւն հայութեան իրաւունքներին եւ ազատութիւններին, շեշտելով, որ հայ համայնքը, որպէս Իրանի լիարժէք քաղաքացի, իր պարտաւորութիւններն ու պարտականութիւնները կատարում է ամենայն պատասխանատւութեամբ եւ լրջութեամբ, փախադարձաբար վայելելով յարգանք եւ ուշադրութիւն՝ Իրանի պետական համակարգի եւ ժողովրդի կողմից:

Հանդիպման ընթացքում հիւրերը ներկայացրեցին պատւիրակութեան Իրան այցելութեան նպատակը եւ գոհունակութիւն յայտնեցին, որ ականատես են լինում նման աշխատանքների եւ դրական գործունէութիւնների՝ միաստւածեան կրօնների միջեւ երկխօսութեան եւ համերաշխ կեցութեան զարգացման ուղղութեամբ:

Պատւիրակութիւնը պաշտօնական հանդիպումից յետոյ, այցելեց “Ս. Յովսէփ Արեմաթացի” եկեղեցի եւ Ս. Ամենափրկչեան Վանքի “Խաչատուր Կեսարացի” անւան թանգարան, հիանալով պատմական կոթողով եւ թանգարանային արժէքաւոր իրերով:

Վերջում, թանգարանի մուտքի առջեւ հաւաքաբար լուսանկարւելուց յետոյ, պատւիրակութիւնը հրաժեշտ տւեց Առաջնորդ Սրբազան Հօրը եւ պրն. Բեգլարեանին: